Nutrition Month Celebration ng SFHS, naging matagumpay!

(Balita ni JC Hope D. Cariño-July 31, 2008-Miyerkules)  

 Nuro, Upi………Tagumpay na idinaos ang Nutrition Month Celebration ng Saint Francis High School sa Upi, Shariff Kabunsuan noong July 24 at 25.

Slogan writing contest, poster making contest, essay writing, nutrition quiz bowl, parlor games, at booth display ang ilan sa mga patimpalak na nilahukan ng mga panauhin mula sa anim na dibisyon.

Nagkaroon din ng forum o lecture na pinangunahan ni Mrs. Jacqueline F. Gamit hinggil sa tema ng nutrisyon ngayong taon na, “Sa wastong nutrisyon ni mommy, siguradong Healthy si Baby.”

Tampok naman sa hapon sa SFHS Social Hall ang nutrition jingle contest na pinaglabanan ng bawat pangkat, at ang inabangang “Search for Mr. and Ms. Nutrition 2008.”

Mga magsasaka ng mais sa Upi, malungkot sa mababang buying price ng mais.

Baita ni Lolita Savariz-July 31, 2008-Miyerkules)  

 Nuro, Upi…NAGPAHAYAG NG KALUNGKUTAN ang mga magsasaka sa Upi, Shariff Kabunsuan dahil sa patuloy na pagbaba ng buying price ng mais nitong nakalipas na mga araw.

Ayon kay corn buyer Hadji Macmod Salipada kahapon lang ay P9.80 bawat kilo ang buying price ngunit ngayon ay bumaba pa ito at naging P9.70 na lang ang bawat kilo.

Idinagdag ni Salipada na marami na ang supply ng mais sa Upi kayat mura ang kanyang pagbili.

GAGAWIN ngayong araw ang regular meeting ng Upi municipal peace and order council o MPOC.

Balita ni Maria Cristina Rona Piang-July 31, 2008-Miyerkules)  

Inaasahan ang pagdalo ng mga kasapi ng MPOC na kinabibilangan ng mga barangay official, municipal officials, kinatawan mula sa mga government line agencies, school officials, non government and peoples organizations, PNP at AFP at iba pang stakeholders.

Posibleng maging tampok sa pulong ang mga kaso ng nakawan ng hayop at iba pang krimen sa bayan at kung paano ito mabibigyan ng solusyon. (Para sa DXMS Bantayan, Nenita Minted ng DXUP naninindigan para sa katotohanan)

Walong kaso ng nakawan ng hayop, naitala ng PNP sa Upi mula Enero.

Balita ni Nineta Minted-July 31, 2008-Miyerkules)  

Nuro, Upi…UMAABOT sa walong kaso ng nakawan ng hayop o cattle rustling ang naitala ng PNP sa Upi, Shariff Kabunsuan mula Enero ngayong taon.

Sinabi ni police investigator PO2 Carlo James Clarete na ito ay mas mababa kumpara noong 2007 kung saan nakapagtala ang PNP ng 10 kaso mula Enero hanggang Hulyo.

Ayon kay Clarete kahirapan sa buhay ang nakikita nilang pangunahing dahilan ng nakawan ng hayop.

Posibleng organisadong grupo ang nasa likod ng serye ng pagnanakaw na ito batay sa police intelligence report, ayon kay Clarete.

Karamihan sa mga ninanakaw ay baka at kalabaw.

Dahil dito, nanawagan si Clarete sa taumbayan na maging mapagbantay at alerto upang hindi mabiktima ng cattle rustling.

Nutrition month celebration sa Upi, Shariff kabunsuan, pormal nang nagtapos.

(Ulat ni Noralyn Bilual July 31, 2008-Miyerkules)  

Nuro, Upi……PORMAL nang nagtapos ang nutrition month celebration sa Upi, Shariff Kabunsuan kahapon.

Tampok sa culminating program sa municipal gymnasium ang mga ina at mga preschooler mula sa ibat-ibang barangay ng Upi.

Dumalo ang mga ina at mga kababaihan sa pangunguna ni Upi Women’s Federation president Amelita Piang.

Dumalo din sina town Councilor  Ma. Elena II Castro, Social welfare officer Marilou Diestro at mga day-care worker mula sa 23 barangays.

Sinabi ni Diestro na layunin ng isang buwang selebrasyon ay maunawaan ng mga ina ang kahalagahan ng tamang nutrition.

Tema ng selebrasyon ay “SA WASTONG NUTRISYON NI MOMMY TIYAK ANG KALUSUGAN NI BABY.”

Tampok din sa okasyon ang pag-display ng mga prutas at gulay na sagana sa nutrisyon.  Kasama rin sa programa ang pa-kontest sa pag-awit at pagsayaw.

Batas para sa kalikasan, ipinatutupad na sa Upi, Barangay Nuro, malinis na.

 (Ulat Lucy Billones -Duce- July 31, 2008-Miyerkules)  

Nuro, Upi…… Upang mapalakas ang kampanya sa pangangalaga sa kalikasan, puspusan ang pagpapatupad ng municipal ordinance No. 3 o ang Ecological Solid Waste Management Program ( ESWM) sa Upi, Shariff Kabunsuan.

Sa ngayon, ayon kay municipal environment and natural resources officer Glory Centillo, abala sila sa information dissemination upang maunawaan at tuparin ng mga mamamayan ang ordinansa.

Kabilang dito ang paglalagay ng mga billboard sa mga estratehikong lugar at pamplet o babasahin sa mga mamamayan.

Sinabi ni Centillo na may parusa o multa ang mga mapapatunayang lumabag sa naturang ordinansa.

Dahil sa batas na ito, malinis at maganda na ang bayan ng Upi.  Umaani rin ng suporta sa lahat ng sektor ang programang ito ng lokal na pamahalaan.

Ayon kay Centillo, ang pangangalaga sa kalikasan ay tungkulin ninuman at hindi ng iilan lamang.

(Pambasang Batas tungkol sa Kalikasan ay ang Republic Act 9003)

DXUP-FM reporters, isinailalim sa enhancement training on news writing and news reporting

 (Kaka Alih- July 31, 2008-Miyerkules)  

Nuro, Upi……SA HANGARING MADAGDAGAN ANG KAALAMAN sa pagsusulat ng balita, isinailalim sa isang seminar workshop ang mga reporter ng DXUP-FM kahapon.

Hangad ng Community Media Media Educational Council  o CMEC na lalo pang mahasa ang mga reporter sa pagsusulat ng balita at pag-uulat nito sa publiko.

Ang workshop na pinangasiwaan ni DXMS Station Manager Edwin Fernandez ay ginanap sa municipal hall conference room.

Ayon kay DXUP Station Manager Mario Debolgado,  kinakailangan ang dagdag na kaalaman ng mga field reporters  upang lalong mapabuti ang serbisyo sa mga mamamayan ng Upi at kalapit bayan.

Inaasahang pagkatapos ng seminar-workshop ay sapat na ang galing at kakayahan ng mga reporter sa pangangalap at paghahatid ng tunay na balita.

Ang DXUP ay isang community radio na pinapangasiwaan  ng CMEC at mas kilala sa buong Shariff Kabunsuan bilang Upi for Peace.

(Para sa Karagdagang kuhang larawan please CLICK)