Bagong Buwan ng Ramadan

 (July 29, 2011 -Biyernes- Script na sinulat ni Alih Anso para sa programang “Buhay –buhay sa DXUP” (7:00-8:00 A.M) sa segment na “Nakaka”. Host Nancy Lawan)

Host/Nancy:     Nalalapit na ang pag-aayuno ng mga kapatid na Muslim sa buong mundo, ang buwan ng Ramadan ang buwan ng pag—ayuno, kailan ba ang bagong buwan ng Ramadan? Iyan ang sasagutin  ni Kaka Ali sa ating segment na Nakaka.

(Play- Intro-Nakaka)

Host/Nancy:  Magandang umaga, Kaka Ali,    

Kaka Ali:   Magandang umaga Nancy. Assallamu alaikum WW.   

Ang tanong ay “Kailan ang bagong buwan ng Ramadan?”

Ayon sa   Darul Ifta, (ito  ang  committee o grupo na naatasan para  sa pagsilay ng bagong buwan  moon sighting of the new  moon)  sa July 30,  bukas sa araw ng Sabado, pagsapit ng Magrib na salah (prayer) mga ganap na ika anim ng gabi at kung masisilayan saan mang bahagi  ng bansa  ang buwan,  ay ito na ang  hudyat na mag-uumpisa na ang   Ramadan.

Ang Ramadan  ay  ang buwan ng pag-aayuno ng mga Muslim.

Ano ang basehan ng pagsilay sa bagong buwan?

Ang basehan ng mga Muslim sa pagsilay sa bagong buwan ng Ramadan ay ayon na rin sa sinabi ni    Propeta Muhammad (SAW):

“Huwag magsimulang mag‑ayuno hangga’t hindi ninyo nakikita ang bagong buwan, subali’t kung maulap, buuin ang tatlumpung araw ng buwan ng Shaban -ang buwan na sinusundan ng Ramadan, at huwag titigil  sa pag-aayuno  hangga’t hindi ninyo nakikitang muli ang bagong buwan .”

Ayon kay Ustadz Jaafar Alih ng Darul Ifta,  ang committee na naatasan para sa pagobserba sa bagong buwan,  kung sakaling hindi naman makikita ang buwan sa takip silim ng Sabado ay sa   Lunes August 1 ang mag-uumpisa ng pag-aayuno.

Pinapayunahan din ng Darul  Ifta naman ang lahat ng taga Upi  makinig sa announcement sa mga  radio  station sa mga oras na ika-pito hanggang ika-siyam ng gabi  bukas ng gabi July 30,  Sabado para sa official announcement ng Darul Ifta.

Liliwanagin natin ang   Pagtitiyak ng Pagsapit ng Ramadan.

Natitiyak ang pagsapit ng buwan ng Ramadan sa pamamagitan ng  

1. Ang pagkakita sa bagong buwan (new moon) ng buwan ng Ramadan. Kapag nakita ang bagong buwan, kailangan nang mag-ayuno. Sinabi ng Propeta (SAS): “Kapag nakita ninyo ang bagong buwan ay mag-ayuno kayo; at kapag nakita ninyo uli ito ay tapusin na ninyo ang pag-aayuno.” Sa pagtitiyak ng pagkakita ng bagong buwan (new moon) ng buwan ng Ramadan ay sapat na ang isang makatarungang tao, samantalang ang pagtitiyak ng pagkakita sa bagong buwan ng Shawwal ay hindi magiging tiyak kung hindi masasaksihan ng dalawang makatarungang tao.

2.      Ang pagkabuo ng tatlumpung araw ng buwan ng Sha’ban. Kapag nabuo ang tatlumpung araw, ang ikatatlumpu’t isang araw ang siyang unang araw ng buwan ng Ramadan sapagkat ang sabi ng Propeta (SAS): “…Kapag naging maulap para sa inyo [ang langit], buuhin ninyo ang bilang (ng buwan ng Sha’ban) sa tatlumpung araw.”

Ang lahat ng mga Muslim na nasa hustong gulang ay mag-ayuno subalit mayroon din  ang mga pinapayagang na hindi mag-aayuno

1.                     Ang may-karamdamang may pag-asa pang gumaling ngunit mahirap para sa kanya na mag-ayuno. Siya ay pinahihintulutan na hindi mag-ayuno ngunit pagkatapos ng karamdaman ay pag-aayunuhan niya ang mga araw na hindi siya nakapag-ayuno. Sa kabilang dako, ang sinumang may sakit na hindi na maalis-alis, tuloy-tuloy, at hindi na inaasahang mawawala pa, hindi na niya kailangang mag-ayuno ngunit para sa bawat araw na hindi siya nakapag-ayuno ay magpapakain siya sa isang dukha ng isang Mudd (mga 550 gramo) na pagkain o maghahanda siya ng pagkain at anyayahan dito ang mga dukha na ang dami ay katumbas sa bilang ng araw na hindi siya nakapag-ayuno.

2.                     Ang Musafir o manlalakbay. Ipinahihintulot sa Musafir ang paghinto sa pag-aayuno magmula sa oras ng pag-alis niya sa kanyang bayan hangga’t hindi siya nakababalik doon. At kung sakali mang titigil siya sa bayang pinuntahan niya, nananatili pa rin siyang Musafir kung mayroon siyang layuning hindi titigil doon kapag natapos na ang kanyang pakay na siyang dahilan ng kanyang paglalakbay. Ang hatol na ito ay nauukol lamang sa paglalakbay na ang layo ay umabot sa mga 80 kilometro o higit pa.

3.                     Pinahihintulutan din ang isang babae, kapag nagdadalang-tao o nagpapasuso, na hindi mag-ayuno kapag nangangamba siyang baka makasama ang pag-aayuno sa kanyang sarili o sa kanyang anak. Kapag nawala na ang kadahilanan, pag-aayunuhan niya ang mga araw na hindi siya nakapag-ayuno.

4.                     Ang matandang nahihirapang mag-ayuno ay pinapayagang hindi mag-ayuno at hindi na niya pag-aayunuhan ang mga araw na hindi siya nakapag-ayuno ngunit magpapakain siya ng isang dukha sa bawat araw na hindi nakapag-ayuno.

Maraming salamat pos a patuloy ninyong pagsuporta at pakikinig sa ating radio program na Buhay-buhay sa DXUP .…bukas sama-sama tayo sa nakaka ating nakaka na segment.. ito ang inyong Kaka Alih. Sukran and Wassallam.